Tuesday, 28 August 2018

રાષ્ટ્રીય રમત દિવસ


ભારતમાં દર વર્ષે 29,ઓગસ્ટ ને રાષ્ટ્રીય રમત દિવસ તરીકે ઉજવવામાં આવે છે.આ દિવસને રાષ્ટ્રીય રમત દિવસ તરીકે ઉજવવાનું મુખ્ય કારણ હોકીના મહાન ખેલાડી મેજર ધ્યાનચંદજીનો જન્મ દિવસ છે.મેજર ધ્યાનચંદજી આપણી રાષ્ટ્રીય રમત હોકીના પ્રસિદ્ધ રમતવીર હતા.તેથી તેમના જન્મદિવસ ને રાષ્ટ્રીય રમત દિવસ તરીકે ઉજવવામાં આવે છે.મેજર ધ્યાનચંદજી હોકી લઈને જ્યારે રમતના મેદાનમાં ઉતરે ત્યારે જાણે કોઈ જાદુ કરતા હોય એમ તે રમતને જીતાડી દેતા.તેઓ જ્યારે ભારતની હોકી ટીમના કેપ્ટન હતા તે સમયે ઓલમ્પિકમાં ત્રણવાર સુવર્ણચંદ્રક ભારત ટીમે જીત્યા હતા. તેમને “HOCKEY WIZARD” નું ટાઇટલ આપવામાં આવ્યું હતું આ ઉપરાંત તેમને હોકીના જાદુગર પણ કહેવામાં આવતા હતા.ભારત સરકાર દ્વારા મેજર ધ્યાનચંદજી ને પદ્મભૂષણ થી સન્માનિત કરવામાં આવ્યા હતા.
સને 1979,મેજર ધ્યાનચંદજીના મૃત્યુ પછી Indian postal services દ્વારા તેમના સન્માનમાં સ્ટેમ્પ પણ બહાર પડ્યા હતા.આ ઉપરાંત દિલ્હી માં આવેલ રાષ્ટ્રીય સ્ટેડિયમ નું નામ બદલીને ધ્યાનચંદ નેશનલ સ્ટેડિયમ નામ આપી ભારત સરકાર દ્વારા તેમને શ્રદ્ધાંજલિ અર્પણ કરવામાં આવી.
રાષ્ટ્રીય ખેલ દિવસ સ્કૂલ,કોલેજ અને ખાસ કરીને ખેલ એકેડમીઓમાં મનાવવામાં આવે છે.આ દિવસ મનાવવાનો મુખ્ય હેતુ નવયુવાનો ને ખેલ પ્રત્યે જાગૃત કરવાનો અને તેમને રમતોનું મહત્વ સમજાવવાનો છે.રમતો ની મદદથી યુવાનોને નશાથી દૂર લઈ જઈ શકાય છે,તેમની અંદર રહેલી આંતરિક શક્તિઓને બહાર લાવવા,તેમની પ્રતિભાઓને બહાર લાવવા,અને ભારત દેશનું નામ રમતગમત ક્ષેત્ર માં આગળ લાવવાનો છે.આ માટે ખેલ મહાકુંભ,વાર્ષિક રમતોત્સવ અને રમતગમત સ્પર્ધા જેવી પ્રવૃતિઓ દ્વારા બાળકોને    રમતો પ્રત્યે જાગૃતતા કેળવાય અને બાળકોનો શારીરિક વિકાસ થાય તે હેતુસર યોજવામાં આવે છે.આ ઉપરાંત રમતગમત થી બાળકોમાં સમુહભાવના,સાહસ,આત્મવિશ્વાસ જેવા ગુણોનો વિકાસ થાય છે.રમતગમત થી બાળકોની  યાદશક્તિ,એકાગ્રતા અને શરીરની સ્ફૂર્તિમાં વધારો થાય છે.બાળકોની એકલતા અને ચીડિયાપણું દૂર થાય છે.બાળકો જ્યારે ટીમ બનાવી ને બીજે ગામ,શહેર , રાજ્ય કે દેશમાં રમવા જ્યારે ત્યારે તે બીજા બાળકોને તથા તેમની સાથે આવનારા માણસોને પણ જાણે છે અને તેમનામાં રહેલી વિશિષ્ટ  બાબતો ની નોંધ લેવાનો એમને મોકો મળે છે.આમ તેમના મિત્ર વર્તુળમાં વધારો થાય છે.

આ રાષ્ટ્રીય રમત દિવસને દર વર્ષે રાષ્ટ્રપતિ ભવન માં મનાવવામાં આવે છે.આ દિવસે રાષ્ટ્રપતિ પોતે દેશ માટે સૌથી સારું રમનાર ખેલાડી ને સન્માનિત કરે છે.જેમાં ખેલાડીઓને ધ્યાનચંદ એવોર્ડ,નેશનલ એવોર્ડ,અર્જુન એવોર્ડ,રાજીવગાંધી ખેલ રત્ન એવોર્ડ અને બીજા ઘણા એવોર્ડથી સન્માનિત કરવામાં આવે છે.
આ વર્ષે તારીખ 29/8/2019ના રોજ માનનીય પ્રધાનમંત્રી શ્રી નરેન્દ્રભાઈ મોદી દ્વારા ઈન્દિરા ગાંધી સ્ટેડિયમ ,નવી દિલ્હી  ખાતે થી નાગરિકોની શારીરિક પ્રવૃત્તિ અને રમતગમતને રોજિંદા જીવનમાં લાવવા "ફિટ ઇન્ડિયા મુવમેન્ટ" નો આરંભ કરનાર છે.

આપણી શાળાઓ માં પણ ઘણા વિધાર્થીઓ એવા હોય છે કે જેમને ભણવા કરતા પણ ખેલકુંદમાં વધારે રસ હોય છે.શાળાના બાળકો ને પણ આગળ વધવાની તક મળે એ માટે આપણે શાળા કક્ષા એ રાષ્ટ્રીય રમત દિવસ ની ઉજવણી કરવી જોઈએ.આ ઉજવણી શાળા કક્ષાએ કરવામાં આવે તો શિક્ષક મિત્રોને પણ જાણકારી મળે છે કે મારી શાળા માં કયો વિદ્યાર્થી કઈ રમત માં હોશિયાર છે.બાળકોને પણ રમતા રમતા ભણવાની મજા આવે છે.
ચાલો  આપણે પણ રાષ્ટ્રીય રમત દિવસ ની ઉજવણી કરીએ.

“મજબૂત બનીએ, સ્વાસ્થ્ય સુધારીએ
રાષ્ટ્રીય ખેલ દિવસ  આપણે ઉજવીએ”

#છોટી બાતેં
#chhoti baate




No comments:

Post a Comment